Nýjungar hjá Sunddeild UMFN

Sú skemmtilega nýjung hefur nú bæst inn í starf sunddeildar UMFN að ákveðið hefur verið að fara af stað með sundskóla fyrir yngstu börnin. Sundskólinn mun verða starfræktur fyrir börn fædd 2000 og 2001 og munu þau fara í gegnum markvissa vatnsaðlögun sem kemur til með að auka hreyfifærni þeirra, einnig öðlast þau öryggi í vatni ásamt því að læra undirstöðuatriðin í sundnámi.

Kennari í sundskólanum er Ásgerður Bjarklind Bjarkadóttir íþróttafræðingur. Boðið verður uppá tvær kennslustundir í viku, á þriðjudögum og miðvikudögum kl. 18:00 – 18:45 í sundlaug Njarðvíkur og geta foreldrar valið um að vera 1x eða 2x í viku. Gjaldið mun verða 3000 kr. fyrir mánuðinn fyrir þá sem eru tvisvar í viku og 1500 kr. fyrir þá sem eru einu sinni.

Áhugasamir geta haft samband  við Ásgerði í síma 867 0851. Í sumar mun síðan hið árlega sundnámskeið fyrir börn fara fram í sundlauginni í Njarðvík dagana 12. – 30.júní. Kennari á sundnámskeiðinu mun einnig verða Ásgerður Bjarklind en hún hefur verið að gera góða hluti hjá yngri krökkunum í Njarðvík.

Fréttatilkynning frá Sunddeild UMFN