Njarðvíkingum sópað út úr Síkinu og Íslandsmótinu
Tindastóll sýndi enga miskunn þegar Njarðvík mætti á Krókinn í fjórða leik liðanna í kvöld. Njarðvíkingar máttu sín lítils gegn sterkum Stólunum sem unnu yfir fjörutíu stiga sigur og sendu gestina í sumarfrí. Lokatölur 117:76 í kvöld og 3:1 í einvíginu.
Að öllum líkindum var þetta síðasti leikur fyrirliðans Loga Gunnarssonar sem hefur leikið um 400 leiki með Njarðvík. Ótrúlega leiðinlegt að jafn glæstum ferli skuli ljúka með svona útreið.
Njarðvíkingar sáu aldrei til sólar á Sauðárkróki í þessum fjórða leik. Tindastóll tók forystu í upphafi og jók forskotið jafnt og þétt eftir því sem leið á leikinn. Stólarnir höfðu náð tuttugu stiga forystu eftir fyrsta leikhluta og leiddu með 34 stigum í hálfleik (68:34).
Njarðvíkingar fjölmenntu norður til að styðja sitt lið en voru sendir niðurlútir heim og þátttöku þeirra í Íslandsmótinu er lokið í ár.
Tindastóll - Njarðvík 117:76
(34:14, 34:20, 20:16, 29:26)
Njarðvík: Dedrick Deon Basile 16/4 fráköst/7 stoðsendingar, Haukur Helgi Pálsson 13/10 fráköst, Maciek Stanislav Baginski 12, Nicolas Richotti 12, Mario Matasovic 11/9 fráköst, Logi Gunnarsson 4, Jose Ignacio Martin Monzon 4/4 fráköst, Ólafur Helgi Jónsson 3, Elías Bjarki Pálsson 1, Jan Baginski 0, Rafn Edgar Sigmarsson 0.
