Njarðvíkingar senda öðru sinni kvennalið til leiks
„Rökrétt skref að yngja leikmannahópinn í ár,“ segir Dagmar Þráinsdóttir, þjálfari Njarðvíkur.
Knattspyrnudeild UMFN sendi kvennalið í fyrsta skipti til þátttöku í bikarkeppni KSÍ á síðasta tímabili. Kvennalið Njarðvíkur fékk þá nágranna sína Grindavík í heimsókn og má segja að Njarðvíkurkonur hafi staðið sig hetjulega í frumraun liðsins þótt gestirnir hafi unnið leikinn. Nú ári síðar tekur Njarðvík aftur þátt í bikarkeppninni og mætir ÍH næstkomandi sunnudag klukkan 14 á útigervigrasinu við Nettóhöllina. Dagmar Þráinsdóttir, þjálfari Njarðvíkur, segir að töluverðar breytingar hafi orðið á leikmannahópnum.
„Leikmannahópurinn í ár er töluvert breyttur frá því í fyrra og nú skipa fleiri ungar og efnilegar knattspyrnukonur hópinn í bland við nokkrar eldri og reynslumeiri,“ segir Dagmar.
„Markmiðið er að senda lið til leiks á Íslandsmótið í knattspyrnu á næsta ári og því rökrétt skref að yngja leikmannahópinn í ár með leikmönnum sem gætu mögulega spilað með liðinu í 2. deild á næsta ári ef allt gengur upp.“
Uppgangur kvennaknattspyrnunnar í Reykjanesbæ er búinn að vera ævintýralegur undanfarin ár og Dagmar segir þetta vera enn eitt skrefið í þeirri vegferð að bæjarfélagið eignist lið í 2. deild þar sem ungar og efnilegar knattspyrnukonur fá tækifæri til að stíga sín fyrstu skref í meistaraflokki.
