Njarðvíkingar með rétta tímasetningu á sigurleik á Sauðarkróki

Úrvalsdeildarlið Njarðvíkur valdi aldeilis réttu stundina til að brjóta á bak aftur heimavallarveldi Tindastóls með sannfærandi 79-100 sigri í leik þar sem Logi Gunnarsson var hreinlega óstöðvandi í seinni hálfleik en piltur endaði með 36 stig (9 í fyrri hálfleik). Leikurinn var í beinni útsendingu á Sýn.Deildarmeistararnir eru því komnir með yfirburðastöðu eftir fyrstu tvo leikina gegn Tindastól í úrslitaviðureignum liðanna um Íslandsmeistaratitilinn í EPSON-deildinni og eiga möguleika á að tryggja sér titilinn á heimavelli næstkomandi laugardag. Gestirnir frá Njarðvík náðu strax í upphafi frumkvæðinu í leiknum, hittu eins og heimavelli auk þess að spila mjög góða vörn. Sauðkrækingar áttu við sama vanda og undanfarið að stríða, bakvörðum liðsins gengur óheyrilega illa að setja niður langskotin og gerðu hinu öflugu fram- og miðherjum liðsins erfiðara fyrir. Logi Gunnarsson fór fyrir sunnanmönnum en auk stiganna 36 náði hann náði hann 4 fráköstum og gaf 3 stoðsendingar. Daninn Jes Hansen (20 stig, 11 fráköst), Brenton Birmingham (11 stig, 9 fráköst og 11 stoðsendingar) og Teitur Örlygsson (16 stig, 7 fráköst og 2 stoðsendingar) léku allir óhemjuvel og Halldór Karlsson átti klassíska innkomu í fyrri hálfleik (9 stigj og 6 fráköst) og skoraði öll sín stig á stuttum tíma. Friðrik Stefánsson var sem virki í vörninni og skilaði 13 fráköstum með stigunum sínum 6.

Segja má að leikaðferð Njarðvíkinga hafi skilað sér fullkomlega í fyrstu leikjunum tveimur, þeir hjálpa vel inn í teiginn gegn þeim Myers og Antropov sérstaklega frá þeim Ómari, Lárusi og Pomones sem hitt hafa afar illa seinni hluta úrslitakepninnar. Kristinn Friðriksson fær meiri virðingu frá þeim grænklæddu og bjóða þeir honum heldur erfið gegnumbrot en frí langskot. Fram- og miðherjar Sauðkrækinga hafa verið að spila ágætlega, sérstaklega þeir Svavar og Antropov en varnarleikur Njarðvíkinga hefur einnig verið til fyrirmyndar undir körfunni. Sóknarlega hafa deildarmeistararnir of mörg vopn til að Tindastóll nái að stoppa í götin. Eini maðurinn sem þeir hafa getað hjálpað frá hefur verið Friðrik Stefánsson en að skilja hann eftir er ávísun á sóknarfrákast og annað tækifæri fyrir eitraðar skyttur liðsins til að skora.

Í leikslok lofaði Teitur Örlygsson, eftir afar hógvært tímabil, sigri í þriðja leik liðanna sem fram fer á laugardag kl. 16 en Logi Gunnarsson hafði gert slíkt hið sama í hálfleik. Hann bakkaði upp malið með frábærum 27 stigum á 20 síðustu mínútunum.