Njarðvíkingar mæta Breiðabliki á miðvikudag

Njarðvíkingar spila á miðvikudag, þriðja og síðasta leikinn við Breiðablik í 8-liða úrslitum í körfubolta. Friðrik Ragnarsson þálfari Njarðvíkinga segir að leikurinn leggist vel í sig og hann lofar því að liðið muni ekki spila jafn illa og í síðasta leik þar sem þeir töpuðu í Kópavogi 73:70.
„Leikurinn á morgun leggst mjög vel í mig enda munum við ekki koma til með að spila svona illa aftur. Við spiluðum hrikalega illa í leiknum á sunnudag en nú erum við á heimavelli og þar vinnum við“

En hvað gerðist í gær?
„Þetta var einfaldlega vanmat og ekkert annað. Blikar eru betri en flestir halda og við verðum auðvitað að leggja okkur 100% fram gegn þeim eins og öðrum en það gerðum við ekki í gær“.

Er komið eitthvað stress í mannskapinn?
„Nei við erum vanir þessu og svona er úrslitakeppnin. Við verðum að bíta frá okkur og við erum með pálmann í höndunum því við eigum þriðja leikinn heima“

Ætlaru að leggja eitthvað sérstakt upp fyrir leikinn?
„Já ég ætlast til þess að menn mæti með rétt hugarfar í leikinn. Við erum betri en þeir á öllum sviðum og með betri einstaklinga í öllum stöðum þannig að við eigum að vinna þetta ef hugarfarið er rétt“.

Finnst þér þið spila eins vel með Pete Philo innanborðs?
„Það hefur tekið hann aðeins meiri tíma að falla inní liðið en ég var að vonast eftir en þetta fer þó að smella saman hjá okkur í næstu leikjum. Við verðum samt sem áður að halda áfram að spila okkar leik þó svo við séum komnir með sterkari hóp og það kemur í næsta leik.“