Njarðvíkingar í góðri stöðu
Njarðvíkingar eru komnir með tvo sigra í einvígi sínu við Grindavík í átta liða úrslitum Subway-deildar karla í körfuknattleik eftir góðan sigur í Grindavík í gær. Þeir eru því í vænlegri stöðu því þrír sigrar tryggja sæti í undanúrslitum.
Njarðvíkingar byrjuðu betur og höfðu sex stiga forystu að loknum fyrsta leikhluta (19:25), heimamönnum tókst að minnka muninn í fimm stig í öðrum leikhluta (43:48) og héldu áfram að saxa á forskotið í þeim þriðja.
Þegar fjórði leikhluti hófst átti Njarðvík þrjú stig (66:69) en áfram héldu Grindvíkingar að setja pressu á gestina og náðu að jafna og komast yfir (73:72). Það stefndi því í mikla spennu á lokamínútunum eins og í fyrri leiknum en í stöðunni 79:79 sigldu gestirnir úr Njarðvík fram úr heimamönnum með góðu framlagi Hauks Helga Pálssonar sem setti niður ellefu stig á lokamínútunum, þar af tvo þrista. Lokatölur 86:94 og Grindvíkingar eiga á brattann að sækja ætli þeir sér lengra í úrslitakeppninni.
Sem fyrr lét Ólafur Ólafsson mikið að sér kveða í liði heimamanna, var með átján stig, sjö fráköst, fimm stolna bolta og 24 framlagspunkta. Þá var Damier Erik Pitt með 24 stig.
Grindavík - Njarðvík 86:94
(19:25, 24:23, 23:21, 20:25)
Grindavík: Damier Erik Pitts 24, Ólafur Ólafsson 18/7 fráköst/5 stolnir, Zoran Vrkic 17/5 fráköst, Nökkvi Már Nökkvason 8, Kristófer Breki Gylfason 8, Gkay Gaios Skordilis 8/10 fráköst/5 stoðsendingar, Bragi Guðmundsson 3, Hilmir Kristjánsson 0, Magnús Engill Valgeirsson 0, Valdas Vasylius 0, Hafliði Ottó Róbertsson 0, Hinrik Guðbjartsson 0.
Njarðvík: Dedrick Deon Basile 30/6 fráköst/6 stoðsendingar, Haukur Helgi Pálsson 21/4 fráköst, Lisandro Rasio 16/7 fráköst, Nicolas Richotti 12/5 fráköst/6 stoðsendingar, Mario Matasovic 11/7 fráköst, Oddur Rúnar Kristjánsson 2, Maciek Stanislav Baginski 2, Elías Bjarki Pálsson 0, Jan Baginski 0, Logi Gunnarsson 0, Rafn Edgar Sigmarsson 0, Ólafur Helgi Jónsson 0.
