Njarðvík tapar fyrsta heimaleiknum

Það var fátt um fína drætti þegar Njarðvíkingar lutu í lægra haldi gegn HK í kvöld. Staðan að leik loknum var 0-1 HK í vil. Þetta var fyrsti tapleikur Njarðvíkinga á heimavelli í sumar. Liðin voru bæði vör um sig í fyrri hálfleik og sóttu ekki mikið en áttu þó ágætis rispur við og við.

Seinni hálfleikur var þó aðeins tilþrifameiri og til tíðinda dró þegar Hörður Már Magnússon skoraði fyrir HK á 61.mínútu með góðu skoti rétt fyrir utan teig. Eftir markið sóttu Njarðvíkingar í sig veðrið en voru frekar bitlausir og féllu oft í rangstöðugildru HK-manna. Á 92. mínútu fengu þeir grænklæddu sitt besta færi þegar varamaðurinn Magnús Ólafsson fékk sendingu inn fyrir vörnina, var einn á móti markmanni og hugðist vippa boltanum yfir hann en allt kom fyrir ekki og skotið var vel varið af Gunnleifi Gunnleifssyni.

Alls var 5 mínútum bætt við leikinn en Njarðvíkingar náðu ekki að nýta sér það og því fyrsta tapið á heimavelli í sumar staðreynd.
Mynd úr safni