Njarðvík og Keflavík töpuðu úti

Þrautagöngu Njarðvíkinga lauk í Evrópukeppninni í körfuknattleik í gærkvöldi er þeir urðu að sætta sig við sinn sjötta og síðasta ósigur í riðlakeppninni. Íslandsmeistarar Njarðvíkur mættu eistneska liðinu Tartu Rock og lutu þar í lægra haldi 100-88 eftir að hafa verið 18-25 yfir að loknum fyrsta leikhluta.

Heimamenn reyndust sterkari á endasprettinum og unnu lokaleikhlutann 33-22. Jeb Ivey var stigahæstur hjá Njarðvík með 22 stig en Brenton Birmingham gerði 20 stig í leiknum.

Igor Beljanski lék ekki með Njarðvíkingum í gær og munaði þar um minna. „Hann var ekki með tilskylda vegabréfsáritun og það kom því miður of seint í ljós. Það munaði um hann í þessari baráttu því Friðrik Stefánsson hefði vel getað notað nokkur aukakíló í baráttunni undir körfunni í gær,“ sagði Einar Árni Jóhannsson, þjálfari Njarðvíkinga, í samtalvi við Víkurfréttir.

„Við vorum 10 stigum yfir um miðjan þriðja leikhluta en við það fóru Tartu-menn í gang og settu niður stóra þrista og svo byrjuðu þeir fjórða leikhlutann bara betur en við,“ sagði Einar en Njarðvíkingar eru væntanlegir til landsins seinni partinn í dag og geta nú farið að einbeita sér að deildarkeppninni þegar Evrópuævintýrið er úti.

Nágrannar Njarðvíkinga í Keflavík máttu einnig sætta sig við ósigur í gær og það gegn sænska liðinu  Holmen Norrköping. Lokatölur leiksins voru 113-109 í jöfnum og spennandi leik. Thomas Soltau átti góðan dag í liði Keflavíkur með 29 stig og 13 fráköst en Tim Ellis varð snemma frá að víkja sökum meiðsla en ekki er víst hversu alvarleg meiðslin eru.