Njarðvík og Keflavík leika til úrslita
Suðurnesjaliðin Njarðvík og Keflavík munu leika til úrslita í Powerade bikarkeppninni í körfuknattleik á laugardag kl. 16:00 í Laugardalshöll. Keflvíkingar lögðu Skallagrím 88-81 í undanúrslitum á fimmtudagskvöld og Njarðvíkingar höfðu sigur á KR 102-95.
Jermaine Williams var stigahæstur Keflvíkinga með 24 stig og 14 fráköst en hjá Njarðvík gerði Jeb Ivey 29 stig í leiknum gegn KR. Leikir Njarðvíkur og Keflavíkur voru skemmtilegir og opnir á fimmtudagskvöld og þóttu gefa góð fyrirheit um komandi leiktíð í Iceland Express deildinni sem hefst þann 19. október næstkomandi.
