Njarðvík í þriðja sæti eftir sigur

Njarðvíkingar unnu góðan útisigur á Haukum, 1-2, í 1. deild karla í knattspyrnu í kvöld. Með því komust þeir upp í þriðja sæti deildarinnar.

Heimamenn voru sterkari aðilinn framan af og komust yfir á 17. mínútu með marki frá Sævari Eyjólfssyni, sem lék með Njarðvík um árabil.

Haukar sóttu mun meira í fyrri hálfleik án þess þó að skapa sér markverð færi, en gestirnir héldu sig aftarlega á vellinum og beittu skyndisóknum ef þeir fengu boltann. Það var úr einni slíkri sem Njarðvíkingar jöfnuðu á 41. mín, en þá fékk Eyþór Guðnason stungusendingu inn fyrir vörn Hauka frá Milan Janosevic og skoraði örugglega.

Staðan í leikhléi var 1-1 en í síðari hálfleik sóttu Njarðvíkingar í sig veðrið. Þeir voru mun líflegri en í byrjun leiks og tóku stjórnina í sínar hendur.

Á 68. mín kvaddi Guðni Erlendsson sér hljóðs og skoraði sigurmarkið með skoti utan af velli. Skotið hafði viðkomu í varnarmanni og hafnaði í möskvum Haukamarksins. Sigur Njarðvíkur var ekki í hættu eftir það og er gengi þeirra grænklæddu í sumar framar vonum og sitja þeir í þriðja sæti 1. deildarinnar eins og áður sagði.