Njarðvík gerði jafntefli við toppliðið

Njarðvík tók á móti Kórdrengjum á Rafholtsvellinum í 2. deild karla í gær. Njarðvíkingar eru í sjötta sæti deildarinnar en ekkert langt frá að blanda sér almennilega í baráttuna um að komast upp. Leikurinn var jafn og spennandi og heimamenn líklegri en toppliðið til að fara með sigur af hólmi.

Magnað mark Bessa

Njarðvíkingar voru ákveðnari í upphafi leiks og í sókn þeirra á 23. mínútu tók Stefán Birgir Jóhannesson skot sem hrökk af varnarmanni Kórdrengja þá tók Bessi Jóhannsson viðstöðulaust skot sem svínlá í samskeytunum. Geggjað mark og Njarðvík komið með forystu.

Þegar leið á seinni hálfleikinn náðu Kórdrengir að jafna (71') og þar við sat. Leikurinn var ekki mikið fyrir augað en jafn og spennandi. Niðurstaðan 1:1.