Nick Bradford snýr aftur!

Stjórn körfuknattleiksdeildar Keflavíkur hefur ákveðið að segja miðherjanum Mike Matthews upp störfum og fá í stað hans Nick nokkurn Bradford, sem ætti að vera Keflavíkingum að góðu kunnur. Bradford lék með Keflavík í fyrra við góðan orðstý og var einn að lykilmönnum liðsins sem vann tvöfalt hér heima og náði áður óþekktum hæðum í Evrópubikarnum.

Á heimasíðu Keflavíkur kemur fram að forráðamönnum félagsins fannst sem Matthews hafi ekki fallið nógu vel inn í liðið og verði þeir því öflugri með Nick innanborðs.

Nick lék afar vel með Keflavík seinni hluta leiktíðar í fyrra, eftir að hafa átt frekar brösuga byrjun. Hann lék sérlega vel í Evrópubikarnum þar sem hann skoraði yfir 20 stig að meðaltali, tók um 10 fráköst og gaf um 5 stoðsendingar á leik. Nick er auk þess sérlega grimmur og fjölhæfur varnarmaður.

Bradford hefur leikið í Englandi í haust en aðstæður voru honum ekki að skapi. Því hafði hann samband við fyrrum vinnuveitendur sína í Keflavík og sagðist tilbúinn til að snúa aftur.

Stjórnin hlakkar til að sjá Nick aftur í Keflavíkurbúningnum um leið og þeir þakka Mike fyrir hans framlag.