Naumt tap í sveiflukenndum leik
Njarðvík tapaði naumlega fyrir Val í annarri umferð átta liða úrslita Subway-deildar kvenna í kvöld og staðan í einvígin því jöfn, 1:1. Leikurinn var sveiflukenndur og lokamínúturnar hörkuspennandi.
Valur - Njarðvík 80:77
(21:27 | 23:10 | 16:26 | 20:14)
Njarðvík byrjaði betur og leiddi eftir fyrsta leikhluta með sex stigum (21:27) en afleitur annar leikhluti, þar sem Njarðvíkingar skoruðu aðeins tíu stig, varð til þess að Valur hafði náð forystunni í hálfleik (44:37).
Í þriðja leikhluta snerist dæmið algjörlega við og sókn Njarðvikinga hrökk aftur í gang og skoruðu nú 26 stig gegn sextán heimakvenna. Staðan 60:63 og því gat brugðið til beggja vona í fjórða og síðasta leikhluta.
Valskonur skoruðu tíu fyrstu stigin í fjórða leikhluta og komust því í sjö stiga forystu (70:63) áður en Isabella Ósk Sigurðardóttir setti loks niður fyrstu stig Njarðvíkinga eftir þriggja mínútna leik. Valur svaraði því með þristi og var komið í átta stiga forystu (73:65).
Þá komust Njarðvíkingar á gott skrið og breyttu stöðunni í 73:71 og lokamínúturnar voru æsispennandi.
Brooklyn Pannell, leikmaður Vals, reyndis Njarðvíkingum erfið í lokin en hún jók muninn í fjögur stig (75:71). Jana Falsdóttir setti þá niður tvo þrista og kom Njarðvík yfir (75:77) en Pannell skoraði fimm síðustu stigin í leiknum og Valskonur jöfnuðu einvígið. Lokatölur 80:77.
Stig Njarðvíkur: Selana Lott 27 stig, Lára Ösp Ásgeirsdóttir 14 stig, Jana Falsdóttir 8 stig, Isabella Ósk Sigurðardóttir 8 stig, Emelie Hesseldal 6 stig, Ena Viso 6 stig, Andela Strize 6 stig og Hulda María Agnarsdóttir 2 stig.
