Meiðsli Jóhanns ekki jafn alvarleg og fyrst var talið

Batahorfur Jóhanns B. Guðmundssonar eru mun skárri en fyrst var ráðgert en Jóhann meiddist illa á dögunum og talið var að hann yrði frá út leiktíðina í Svíþjóð. Jóhann leikur með GAIS í sænsku úrvalsdeildinni knattspyrnu og hefur verið byrjunarliðsmaður þar alla leiktíðina uns hann meiddist.

Um þarnæstu helgi fer Jóhann í myndatöku og þá veður endanlega skorið úr um hver meiðslin séu. „Þetta er líkast til slæm tognun á liðbandi í hné, ég er orðinn þokkalegur svo krossbandið er örugglega ekki slitið,“ sagði Jóhann í samtali við Víkurfréttir. Jóhann stefnir að því að reyna að leika með GAIS í síðasta leiknum á leiktíðinni en hann fer fram þann 5. nóvember næstkomandi.

GAIS eru nýliðar í sænsku úrvalsdeildinni og var þeim spáð falli á þessari leiktíð en liðið hefur verið að koma nokkuð á óvart. GAIS er í 10. sæti deildarinnar en Jóhann segir að liðið sé ekki úr fallhættu þó mikið þurfi að koma til svo liðið missi sæti sitt í deildinni. „Við erum þokkalega þéttir og höfum ekki tapað mörgum leikjum heldur verið að gera mikið af jafnteflum,“ sagði Jóhann sem á dögunum var valinn í 25 manna hóp fyrir landsleikinn gegn Svíum en það var rétt áður en hann meiddist.