María og Ingvar unnu Bláa Lóns þrautina

María Ögn Guðmundsdóttir og Ingvar Ómarsson komu sáu og sigruðu í Bláa Lóns þrautinni, Blue Lagoon Challenge, sem fram fór í gærkvöldi. Þetta er í fjórða sinn sem María Ögn fer með sigur af hólmi í kvennaflokki keppninnar en hún kom í mark á tveimur klukkustundum og sex mínútum.

Eins og svo oft áður var gríðarleg spenna í karlaflokki þar sem úrslitin réðust á endasprettinum. Svo fór að Ingvar Ómarsson, ríkjandi Íslandsmeistari í fjallahjólreiðum, kom fyrstu í mark, 4 sekúndum á undan Hafsteini Ægi Geirssyni, sem lenti í öðru sæti, og einni og hálfri mínútu á undan Loius Wolf, sigurvegaranum frá því í fyrra. Ingvar hefur þó nokkrum sinnum tekið þátt í Bláu Lóns þrautinni og endað í 2. eða 3. sæti en þetta er í fyrsta skipti sem hann sigrar

Bláa Lóns þrautin eða Blue Lagoon Challenge er stærsta fjallahjólakeppni ársins og var haldin í 22. skiptið í gær. 700 keppendur hjóluðu 60 kílómetra leið, frá Völlunum í Hafnarfirði, um ægifagurt Reykjanesið, og að bílastæðum Bláa Lónsins í Svartsengi í Grindavík.

Keppnin var ræst frá Ásvallalaug í Hafnarfirði þaðan hjólaði hópurinn saman í lögreglufylgd um 3 km leið suður að hesthúsunum þar sem tímataka hófst.