Margt um manninn á Harlem Globetrotters

Það var fjölmennur hópur áhorfenda sem mætti í íþróttahúsið við Sunnubraut til að bera körfuboltakappana í Harlem Globetrotters augum í gær. Sýningin sem þeir settu upp var frábær í alla staði og skemmtu áhorfendur sér konunglega enda fengu þeir mikið fyrir sinn snúð og tóku virkan þátt í leiknum. Skemmst er frá því að segja að Harlem Globetrotters unnu leikinn, 81-53, en liðið sem þeir spiluðu við hét New York Nationals.Sýning Harlem Globetrotters hófst kl. átta og stóð yfir í tvær klukkustundir. Allt var gert til að áhorfendur skemmtu sér sem best enda fengu þeir eins og áður sagði að taka virkan þátt í leiknum. Í leiknum sjálfum var mikið um troðslur, snilldar knattrækni og glæsilegt sampspil. Tveir leikmanna liðsins voru með hljóðnema á sér allan leikinn og notuðu þeir hann óspart til að fíflast í dómara leiksins og áhorfendum, sem höfðu mikið gaman að.

Eftir leikinn var áhorfendum boðið að fá eiginhandaráritanir frá köppunum og myndaðist strax stór hópur krakka sem ólmir vildu fá nafn stjarnanna á blað. Leikmenn liðsins eiga hrós skilið fyrir þá þolinmæði sem þeir sýndu krökkunum og greinilegt að þarna eru gæðablóð á ferð.