Margrét Kara: Bíó fyrir körfuboltaunnendur á Íslandi

Margrét Kara Sturludóttir hefur leikið með bæði Njarðvíkingum og KR á sínum ferli. Hún er af mikilli körfuboltaætt úr Njarðvík og styður að sjálfsögðu frændur sína þá Teit þjálfara og Gunnar formann í baráttunni í kvöld. Hún spáir sigri þeirra grænklæddu í leik mikilla varna í oddaleiknum milli KR og Njarðvík sem hefst klukkan 19:15.

Hvernig fer leikurinn? 
Njarðvík vinnur leikinn með 8 stigum eftir varnarsinnaðan körfuboltaleik. Það liggur mikið undir hjá báðum liðum og spennustigið verður hátt. Mikilvægt er að fá feitt framlag frá allavega 4-5 leikmönnum. Ef Njarðvík heldur áfram að spila þessa stífu vörn og stóru skotin detta niður þá ætti þetta að hafast.

Hvað þurfa Njarðvíkingar að gera til þess að leggja KR á heimavelli? 
Njarðvík á Odd og Hauk alveg inni í skorinu m.v. síðasta leik. Þeir áttu þó ágætissummu saman í stoðsendingum og spiluðu flotta vörn sem var mjög dýrmætt fyrir Njarðvík í síðasta leik. Maciek, Logi og Atkinson eru allt saman orkuboltar sem hafa gríðarleg áhrif á leikinn.

Hvaða leikmenn munum við sjá stíga upp í þessum stóra leik?
Flautukörfurnar hjá Hauki voru risastórar sem og rándýrir þristar á lokamínútum hjá bakvörðunum; Oddi, Loga og Maciek. Það sem stendur eftir er í raun skemmtanagildið sem fylgir þessari seríu: bíó fyrir körfuboltaunnendur á Íslandi.