Loksins hola í höggi hjá Georg

Úrsmiðurinn þaulreyndi, Georg V. Hannah, fagnaði þjóðhátíðardeginum með heldur óvenjulegum hætti í ár. Georg sem hefur lagt stund á golfíþróttina í tæpa hálfa öld gerði sér lítið fyrir og fór holu í höggi þann 17. júní á Hólmsvelli í Leiru.

Draumahöggið kom á áttundu braut en hún er um 130 metrar. Georg var með 7-tré sem vopnið í högginu og hitti boltann ágætlega sem lenti í flatarkanti og rúllaði ofan í, án þess að úrsmiðurinn sæi það enda liggur brautin nokkuð upp í móti og því sjá kylfingar ekki alltaf í holu.

„Þetta er búið að taka tímana tvenna en gaman þegar það kemur loksins,“ sagði Georg, sem hefur haft Leiruna sem sitt annað heimili í hálfa öld. Með honum í ráshópi voru kona hans Eygló Geirdal og Jón Kr. Magnússon.

Georg getur nú boðið Eygló á Hótel Keflavík í gistingu og huggulegheit því hótelið gefur öllum þeim sem fara holu í höggi á þessu ári gistingu með morgunmat.