Lilja og Gunnar Örn stigahæst á Gullmóti KR

Það er óhætt að segja að árangur sundmanna ÍRB á Gullmóti KR hafi verið upp og ofan. Yngri sundmenn voru að standa sig prýðilega þar sem þau Gunnar Örn Arnarson, Soffía Klemenzdóttir, María Halldórsdóttir, Lilja Ingimarsdóttir og Salóme Rós Guðmundsdóttir sigruðu í einni grein eða fleirum.

Þessir sundmenn eru allir að keppa í flokkum 12 ára og yngri og 13 – 14 ára. Þau Gunnar Örn og Lilja sigruðu í stigakeppni einstaklinga í drengja og meyjaflokki og Soffía Klemenzdóttir hafnaði í öðru sæti í stigakeppni telpna.

Það var hins vegar nánast undantekning ef að gullverðlaun í flokki 15 ára og eldri höfnuðu hjá íslenskum þátttakendum. Sterkir erlendir þátttakendur frá Svíþjóð, Danmörku og Skotlandi sáu um að hirða flest gullverðlaunin.

ÍRB hafnaði aldrei þessu vant í öðru sæti í stigakeppni liða, það var þó ekki íslenskt sundlið sem sá um að titillinn hafnaði ekki í Reykjanesbæ, heldur hið firnasterka skoska sundlið Warrender sem kemur frá Edinbourgh. ÍRB var með rétt rúmlega helmingi fleiri stig en næsta íslenska lið.