Lengjudeildin: Tap í Laugardal en stig sótt vestur

Karlalið Njarðvíkur og Grindavíkur hófu leik í Lengjudeildinni í dag. Grindvíkingar sóttu dýrmætt stig til Ísafjarðar en Njarðvíkingar máttu þola tap í höfuðborginni.

Markalaust fram á 60. mínútu hjá Njarðvík

Njarðvík mætti Þrótti Reykjavík á útivelli í fyrstu umferðinni. Leikurinn var í járnum framan af og var staðan markalaus þegar flautað var til hálfleiks. Það voru hins vegar heimamenn sem reyndust sterkari í síðari hálfleik. Örn Bragi Hinriksson braut ísinn á 60. mínútu og stuttu síðar innsiglaði Hlynur Þórhallsson 2:0 sigur Þróttara.

Stig fyrir vestan

Grindvíkingar fóru hina löngu leið vestur á firði þar sem þeir mættu Vestra. Gestirnir byrjuðu leikinn af miklum krafti og kom Ingi Þór Sigurðsson Grindavík yfir snemma leiks. Grindvíkingar héldu forystunni fram í síðari hálfleik en á 58. mínútu tókst Sergine Modou Fall að jafna metin fyrir Vestra. Lokatölur 1:1 og bæði lið fengu því eitt stig í sarpinn í upphafi móts.

Boltanum verður áfram haldið strax næstu helgi þegar önnur umferð deildarinnar fer fram.