Leikmenn velja fyrirliða síðar í vikunni

Knattspyrnulið Grindavíkur mun velja sér fyrirliða síðar í þessari viku að sögn þjálfara liðsins, Milans Stefáns Jankovic. Óðinn Árnason sem verið hefur fyrirliði Grindvíkinga mun ekki leika með liðinu á næstu leiktíð en hann gekk í raðir Fram að lokinni síðustu leiktíð þar sem Grindvíkingar féllu í 1. deild.

 

Milan Stefán sagði í samtali við Víkurfréttir að leikmenn liðsins myndu velja sér fyrirliða en Óli Stefán Flóventsson þykir líklegur til þess að taka við fyrirliðabandinu enda var hann varafyrirliði í tíð Óðins og hefur verið fyrirliði í síðust æfingaleikjum Grindavíkur.

 

Næsti æfingaleikur Grindvíkinga verður gegn Víkingum í næstu viku í Egilshöll en í síðust tveimur æfingaleikjum lögðu þeir Njarðvíkinga að velli en töpuðu gegn HK.

 

Af öðrum málum hjá knattspyrnudeild Grindavíkur er það að frétta að Paul McShane verður áfram með liðinu á næstu leiktíð og er hann væntanlegur til landsins í febrúarbyrjun. Þá segir Milan að margir ungir strákar muni fá tækifæri til að sanna sig í sumar þar sem mikið álag verði á liðinu.

 

Stefnan hjá Grindavík er einnig tekin á að fara aftur til Tyrklands í æfingaferð og sagði Milan að almenn ánægja hefði verið með ferðina í fyrra. Markmiðin í Grindavík eru skýr, stefanan tekin á Landsbankadeild að nýju og ekkert annað kemst að.

 

[email protected]

 

VF-mynd/ [email protected] - Óli Stefán kemur sterklega til greina sem næsti fyrirliði Grindvíkinga.