Lee Sharpe á leið til Grindavíkur?

Samkvæmt óstaðfestum heimildum Víkurfrétta eru Grindvíkingar í samræðum við fyrrum leikmann Manchester United, Lee Sharpe um að leika með liðinu í úrvalsdeildinni næsta sumar. Sharpe spilar þessa stundina með Exeter City í ensku 3. deildinni.Samkvæmt heimildum Víkurfrétta hafa samræður staðið yfir í þó nokkurn tíma og er talið að Sharpe muni koma hingað til lands á allra næstu dögum til að skoða aðstæður.

Sharpe er 31 árs og lék með enska landsliðinu í valdatíð Grahams Taylor. Hann hefur eins og áður sagði leikið með Manchester United og einnig Leeds United og Bradford svo einhver lið séu nefnd. Hann hefur þó átt í töluverðum erfiðleikum undanfarin ár og ekki náð að fóta sig almennilega jafnt innan vallar sem utan. Það er þó engin spurning að kappinn ætti að geta verið Grindvíkingum góður liðstyrkur.