Kristinn Pálsson til Marist University

Einn efnilegasti leikmaður landsins á leið í háskólaboltann

Hinn 18 ára Kristinn Pálsson skrifaði í vikunni undir yfirlýsingu þess efnis að hann hyggðist nema við Marist háskólann í New York fylki. Samhliða náminu mun Kristinn leika körfuknattleik fyrir skólann en Kristinn þykir einn af efnilegri mönnum Íslands í dag.

Kristinn hefur undanfarin 2 ár leikið körfuknattleik samhliða námi hjá liði Stella Azzura á Ítalíu og var á leið heim að spila með liði Njarðvíkur í Domino´s deildinni í vetur þegar áhugi nokkurra háskóla fór að gera vart við sig eftir að kappinn hafði leikið vel með íslenska unglingalandsliðinu í Austurríki í sumar. 

Í samtali við karfan.is sagði Kristinn að honum litist vel á skólann og á körfuboltaprógrammið. Draumur hans væri með þessu að rætast og að hann hefði ekki getað hugsað sér að sleppa þessu tækifæri. 

Marist háskólinn er í u.þ.b. klukkustundar fjarlægð frá New York borg og stendur á bökkum Hudson árinnar. Með kvennaliði skólans leikur annar Íslendingur, Haukakonan Lovísa Henningsdóttir og þá er Andy Johnston, sem þjálfaði karlalið Keflavíkur hér um árið, aðstoðarþjálfari liðsins.