Krakkarnir úr Reyni/Víði hlaupa til Hafnarfjarðar í fyrramálið

Í fyrramálið kl. 8.00 halda krakkarnir í 3. flokki Reynis/Víðis í áheitahlaup til Hafnarfjarðar.

Vf.is hefur fjallað ítarlega um málið á síðustu vikum og nú er loks komið að því að þau bregði undir sig betri fætinum og hlaupi alla leið inn í Hafnarfjörð þar sem þau munu afhenda Guðmundi Hallvarðssyni, formanni samgöngunefndar Alþingis, undirskriftarlista til stuðnings tvöföldunar Reykjanesbrautar.

Vel hefur gengið að safna undirskriftum og er talið að undirskriftirnar séu um fjögur þúsund en ef einhverjir eiga enn eftir að skrá sig er það ekki of seint og þarf aðeins að smella hér til að komast á undirskriftarsíðuna.

Auk undirskriftasöfnunarinnar eru krakkarnir að safna áheitum fyrir keppnisferðalag til Svíþjóðar og hafa verið með sérstakt númer i gangi, 902-5050 þar sem fólk getur hringt inn og látið 300 kr. renna til málefnisins. Upphæðin gjaldfærist á símreikning viðkomandi.
Reynir Þorsteinsson, Víði, segir mikla vinnu hafa verið í kringum þetta átak, en krakkarnir séu orðin mjög spennt fyrir hlaupinu. „Ég vil bara skora á alla Suðurnesjamenn að styrkja krakkana sem hafa lagt svo mikið á sig fyrir málefni Reykjanesbrautarinnar.“