„Komum ekki til að pakka í vörn!“

Keflvíkingar eru vígreifir fyrir leikinn gegn þýska úrvalsdeildarliðinu Mainz sem hefst kl. 18.30 að íslenskum tíma. Um er að ræða fyrri leik liðanna í undankeppni UEFA-bikarsins.

„Strákarnir eru vel stemmdir fyrir leikinn,“ sagði Ásmundur Friðriksson, framkvæmdastjóri knattspyrnudeildar Keflavíkur þegar Víkurfréttir heyrðu í honum fyrr í dag. „Þeir æfðu í hádeginu og hlakka til leiksins. Aðstæður eru með því besta sem gerist. Á leikvanginum eru sæti fyrir 49.000 manns og er búist við því að um 20.000 manns mæti í kvöld. Þegar er búið að selja 19.000 miða. Svo er alveg bongóblíða sem skemmir ekki fyrir.“

Ásmundur sagði að Keflavíkingar myndu halda sig við sitt leikskipulag og spila varlega, sérstaklega í byrjun leiks. „Við komum samt ekki hingað til að pakka í vörn.“

Þess má geta að leikurinn verður sýndur á veitingastaðnum Players í Kópavogi.