Komið að úrslitastundu - átta liða úrslit hefjast í dag
Grindavík og Keflavík í eldlínunni - leikdagar í 8-liða úrslitum
Úrslitakeppni karla í körfubolta hófst í gær með leik Íslandsmeistara KR og Þórs frá Akureyri. Suðurnesjaliðin Grindavík og Keflavík hefja svo leik í kvöld í 8-liða úrslitum.
Grindvíkingar sem höfnuðu í fjórða sæti deildarinnar taka þá á móti Þór Þ. á heimavelli sínum. Liðin unnu hvort sinn leikinn í deildarkeppninni í vetur. Grindvíkingar unnu naumlega 73:71 þegar liðin áttust við í Grindavík í fyrstu umferð. Þórsarar tóku svo slaginn í Þorlákshöfn með 11 stigum, 96:85 í janúar.
Keflvíkingar fara norður og glíma við Tindastól í fyrsta leik. Í Keflavík unnu heimamenn góðan sigur 101:79 í nóvember en Stólarnir hefndu ófaranna með 86:77 sigri fyrir norðan. Liðin áttust við í fyrra í hörku rimmu þar sem Stólarnir fóru með 3-1 sigur af hólmi.
