Knattspyrnutímabilið er búið
Knattspyrnusamband Íslands samþykkti á fundi sínum í dag að hætta keppni í knattspyrnu nú þegar. Þessi ákvörðun er tekin í framhaldi ákvörðunnar sóttvarnaryfirvalda að herða sóttvarnarreglur vegna kórónuveirunnar.
Það er því orðið ljóst í hvaða sæti liðin enda í sínum deildum:
Í Lengjudeild karla eru Keflvíkingar deildarmeistarar og leika í efstu deild að ári en Grindvíkingar munu leika annað tímabil í Lengjudeildinni.
Það var orðið ljóst að Keflavík endar í öðru sæti Lengjudeildar kvenna og leika þær einnig í efstu deild á næsta ári.
Grindvíkingar urðu deildarmeistarar í 2. deild kvenna, þær voru tveimur stigum á eftir HK þegar leik var hætt en áttu leik til góða. Grindavík fer því í efsta sæti með fleiri stig að meðaltali en HK.
Í 2. deild enda Þróttarar í þriðja sæti og Njarðvíkingar í því fjórða. Þróttur var hársbreidd frá því að komast upp í næstefstu deild en liðið gerði jafntefli í síðasta leik og missti þar með Selfoss því upp fyrir sig. Víðismenn ljúka því miður leik í ellefta sæti og leika því í 3. deild á næsta ári.
Reynismenn voru þegar búnir að tryggja sér sæti í 2. deild og enda í öðru sæti 3. deildar.
