Keflvíkingar sigruðu í Sláturhúsinu

Keflavík færðist skrefi nær Grindavík í Iceland Express deild kvenna þegar þær sigruðu granna sína, 83-71, í Sláturhúsinu í gær.

Keflvíkingar höfðu frumkvæðið allan leikinn og leiddu 18-14 eftir fyrst leikhluta. Þær héldu forystunni en náðu ekki að hrista gestina af sér. Staðan í hálfleik var 42-35 þar sem LaKiste Barkus fór fyrir Keflvíkingum með 11 stig.

Grindvíkingar unnu mikið á í upphafi seinni hálfleiks og minnkuðu muninn í 1 stig, 60-59 rétt fyrir lok 3. leikhluta. Birna Valgarðsdóttir, sem átti stórleik í seinni hálfleik setti 3ja siga körfu áður en leiktíminn var úti.

Í upphafi 4. leikhluta náðu Keflvíkingar góðum kafla þar sem þær skoruðu 14 stig gegn 2 og gerðu með því út um leikinn.

Birna og Barkus voru stigahæstar í leiknum, en Bryndís Guðmundsdóttir átti einnig mjög góðan leik með 15 stig og 12 fráköst.

Hjá Grindvíkingum var Jerica Watson stigahæst sem fyrr með 33 stig, 17 fráköst og 10 stolna bolta, en Hildur Sigurðardóttir kom henni næst með 10 stig.

Grindvíkingar eru enn í 2. sæti deildarinnar með 22 stig, en Keflavík er komin í 20 stig í 3. sæti.

VF-mynd/Þorgils