Keflvíkingar komnir áfram í 4-liða úrslit

Keflvíkingar sigruðu Hauka 94:84 í æsispennandi leik í 8-liða úrslitum Epson-deildarinnar í kvöld. Damon Johnson var frábær í liði Keflvíkinga og sýndi og sannaði í þessum leik hversu öflugur hann er þegar á þarf að halda. Hann skoraði 34 stig, hirti 10 fráköst og gaf 8 stoðsendingar.

Heimamenn komu mjög öflugir til leiks og byrjuðu á því að spila hörku vörn sem skilaði sér vel. Keflvíkingar náðu að komast yfir strax í byrjun en þó voru Haukarnir aldrei langt á eftir. Þessi barátta í Keflvíkingum varð til þess að þeir fengu talsvert af villum og það má segja að það hafi haldið Haukum inní leiknum til að byrja með því þeir skoruðu mikið af vítalínunni. Í öðrum fjórðungi tóku Keflvíkingar að síga fram úr og höfðu þeir 15 stiga forskot í hlé, 51:36.
Seinni hálfleikur byrjaði fjörlega og skiptust liðin á því að skora. Haukarnir virtust ekki ætla að gefast upp og byrjuðu að salla þriggjastiga körfum í gríð og erg og allt í einu var örugg forysta heimamanna komin í aðeins fjögur stig. Leikurinn var í járnum þar til um tvær mínútur voru eftir en þá tók Damon nokkur Johnson sig til og setti á stað sýningu með því að skora þriggjastiga körfu og stela svo boltanum og skora tvö stig og koman þannig heimamönnum í átta stiga forskot og þá var út um leikinn.
Hauka liðið má eiga það að það gafst aldrei upp og fyrir það fá þeir prik.
Damon Johnson var eins og áður sagði bestur í liði Keflvíkinga með 34 stig, 10 fráköst og 8 stoðsendingar. Gunnar Einarsson var einnig gríðarlega sterkur þá sér í lagi í fyrri hálfleik en hann skoraði 17 stig ásamt því að spila góða vörn og berjast eins og hundur.
Guðjón Skúlason skoraði 12 stig en aðrir voru með töluvert minna. Allir leikmenn Keflavíkur skiluðu þó sínu og var gaman að sjá hversu vel stemmdir þeir voru i þessum leik.

Keflvíkingar mæta því annaðhvort Grindavík eða Breiðablik í 4-liða úrslitum en það verður að teljast líklegast að þeir mæti Grindavík því Njarðvíkingar ættu að sigra Blika á heimavelli nokkuð létt.