Keflvíkingar kjöldregnir af KR-ingum

Keflvíkingar steinlágu fyrir KR-ingum í vesturbæ Reykjavíkur í kvöld. Lokatölur urðu 4-0 þar sem að heimamenn yfirspiluðu gestina allan leikinn.

Ekki byrjaði leikurinn byrlega fyrir Keflavík en fyrirliðinn Haraldur Freyr Guðmundsson meiddist í upphitun og gat því ekki leikið með liðinu. Unnar Már Unnarsson kom inn í liðið í hans stað og Einar Orri Einarsson tók fyrirliðabandið. Alls gerðu Keflvíkingar fimm breytingar á liði sínu frá því í síðustu umferð þegar liðið lá heima gegn Fylki, 1-3, bar þar helst til tíðinda að hinir ungu Arnór Smári Friðriksson og Fannar Orri Sævarsson fengu tækifærið og byrjuðu inná.

Eins og áður segir voru KR-ingar mun sterkari aðilinn í leiknum þótt að Keflvíkingar hafi byrjað eilítið betur og verið við stýrið fyrstu 15 mínútur leiksins án þess að skapa sér þó hættulegt færi. Fyrsta mark leiksins kom svo á 20. mínútu þegar Þorsteinn Már Ragnarsson skoraði af stuttu færi eftir skalla frá Sören Frederiksen. KR-ingar tóku svo völdin á vellinum í kjölfar marksins og áttu m.a. skot í stöng. Helstu tækifæri Keflvíkinga voru fyrirgjafir frá köntunum sem að ekki voru nýttar betur en svo að enginn þeirra rataði á samherja eða skapaði teljandi usla í vörn heimamanna. Staðan var því 1-0 þegar liðin gengu til búningsherberja í hálfleik.

KR-ingar byrjuðu seinni hálfleikinn af miklum krafti og fengu nokkur góð tækifæri áður en annað mark leiksins leit dagsins ljós. Það kom eftir vítaspyrnu á 55. mínútu sem að Pálmi Rafn Pálmason fiskaði og Óskar Örn Hauksson skoraði af miklu öryggi úr. Enn dró í sundur með liðunum eftir þetta og var aðeins tímaspursmál hvenær þriðja mark KR-inga dytti í hús. Óskar Örn Hauksson skoraði þá með skalla eftir sendingu frá Pálma Rafni á 76. mínútu eftir virkilega vel útfærða sókn heimamanna sem léku á alls oddi. Það var svo á 80. mínútu sem að KR skoraði fjórða og síðasta markið þegar Jacob Schoop átti flotta sendingu beint á höfuðið á Skúla Jóni Friðgeirssyni sem að kláraði með stæl.

Allur vindur var úr Keflvíkingum og átti liðið í basli með sóknaruppbyggingu allan síðari hálfleikinn en sóknarleikur liðsins hefur verið hausverkur allt mótið. KR-ingar voru nær því að skora fimmta markið en Keflvíkingar að laga stöðuna og í raun fátt sem hægt er að segja jákvætt um spilamennsku liðsins þessa dagana en ákveðið hungur og sigurvilja virðist vanta í liðið sem spilar langt undir þeirri getu sem leikmannahópurinn á að búa yfir. Það er verðugt verkefni framundan hjá liðinu að rífa sig uppúr þeim öldudal sem það er búið að koma sér í. Neðsta sæti deildarinnar er staðreynd og kreditstaðan á markatölunni er -11. 

Það er því enn bið á því Keflvíkingar vinni sinn fyrsta leik í sumar. Þeir fá þó tækifæri til að hefna fyrir tapleikinn í kvöld því liðið leikur aftur gegn KR á miðvikudag í Borgunarbikarnum á Nettóvellinum.