Keflvíkingar höfnuðu í þriðja sæti

Keflvíkingar höfnuðu í þriðja sæti í Fótbolta.net mótinu, eftir að hafa sigrað FH í vítaspyrnukeppni í Reykjaneshöll í dag. Staðan var 1-1 eftir venjulegan leiktíma, en það var Hörður Sveinsson sem skoraði mark Keflvíkinga. Í vítaspyrnukeppninni var það Sindri Kristinn Ólafsson, markvörður Keflvíkinga, sem reyndist hetja liðsins. Hann varði þá eina spyrnu gestanna, á meðan Keflvíkingar skoruðu úr öllum sínum spyrnum. Það var vel við hæfi að Hólmar Örn Rúnarsson innsiglaði sigur heimamanna, en Keflvíkingurinn lék einmitt með FH síðustu ár. Sindri var annars frábær í marki heimamanna og varði m.a. stórglæsilega í tvígang í seinni hálfleik og hélt Keflvíkingum þannig inn í leiknum.