Keflvíkingar einir á toppi deildarinnar

Keflvíkingar sigruðu Fylki 3-1 í Símadeildinni í knattspyrnu í kvöld í frábærum leik á Keflavíkurvelli. Jóhann Benediktsson, Guðmundur Steinarsson og Þórarinn Kristjánsson skoruðu mörk Keflavíkur sem eru nú einir á toppi deildarinnar með 7 stig eftir þrjár umferðir. Leikurinn byrjaði strax mjög fjörlega og á 8. mínútu átti Adolf Sveinsson hörkuskot að marki sem markvörður Fylkis varði. Keflvíkingar voru miklu sterkari aðilinn í fyrri hálfleik og á 24. mínútu uppskáru þeir laun erfiðisins þegar Jóhann Benediktsson skoraði með stórglæsilegu skoti á um 30 metra færi. Staðan í hálfleik var 1-0, Keflvíkingum í vil.

Fylkismenn komu mjög sterkir til leiks í seinni hálfleik og sóttu stíft að marki heimamanna sem máttu hafa sig alla við að verjast. Á 53. mínútu munaði litlu að Fylkismenn næðu að skora en þá missti Ómar Jóhannsson markvörður Keflvíkinga boltann klaufalega frá sér en Jóhann Benediktsson náði að bjarga boltanum á línu.

Keflvíkingar lágu mjög aftarlega á þessum kafla leiksins og beyttu skyndisóknum og í einni slíkri, á 60. mínútu, fékk Guðmundur Steinarsson gott færi en skaut framhjá og spurning hvort hann hefði ekki átt að gefa boltann í þeirri stöðu því Magnús Þorsteinsson var í mun betra færi. Það kom þó að því að Keflvíkingar næðu að skora úr skyndisókn og þar var að verki Guðmundur Steinarsson eftir frábæra stungusendingu frá Magnúsi Þorsteinssyni.

Keflvíkingar héldu áfram að sækja eftir þetta og á 76. mínútu fékk Jónas Sævarsson mjög gott færi á að skora en hann ákvað að leggja boltann fyrir Þórarinn sem var kominn aðeins of framarlega. Á 80. mínútu fékk Þórarinn svo dauðafæri en náði ekki að nýta það og svo virtist sem leikurinn myndi enda 2-0. Það var þó alls ekki þannig því á 86. mínútu náðu Fylkismenn að minnka muninn eftir aukaspyrnu og stuttu síðar munaði minnstu að þeir jöfnuðu leikinn en Ómar Jóhanns varði glæsilega. Það er ekki laust fyrir að það hafi farið um áhorfendur Keflavíkur sem sáu fram á jöfnunarmark frá Fylki. Það fór þó ekki þannig því bjargvætturinn sjálfur, Þórarinn Kristjánsson, gulltryggði sigur Keflavíkur á 92. mínútu eftir að hafa sloppið einn inn fyrir vörn Fylkismanna.

Keflvíkingar eru nú einir í efsta sæti deildarinnar með 7 stig eftir þrjár umferðir og óhætt að segja að með svona spilamennsku eins og í kvöld eigi þeir að geta haldið sér í toppbaráttunni enda spiluðu þeir glimrandi góðan bolta.

VF-maður leiksins: Jóhann Benediktsson. Spilaði frábæra vörn, skoraði glæsilegt mark og bjargaði skemmtilega á línu. Þarf að segja meira?
Tilþrif leiksins: Mark Jóhanns Benediktssonar og markvarsla Ómars Jóhannssonar þegar hann varði skot á leið í vinkilinn frá Fylki á 89. mínútu.