Keflvíkingar búnir að tapa tveimur leikjum

Annar leikur úrslitanna um Íslandsmeistaratitilinn í körfuknattleik karla fór fram í Þorlákshöfn í kvöld. Þórsarar, sem unnu fyrsta leikinn, héldu áfram sigurgöngu sinni og sigruðu Keflavík öðru sinni. Deildarmeistarar Keflavíkur eru nú tveimur leikjum á eftir í baráttunni og þurfa að vinna þrjá næstu leiki til að tryggja sér titilinn.

Eins og í fyrri leiknum byrjuðu Þórsarar með látum og náðu góðri forystu í fyrstu tveimur leikhlutunum (27:22 og 20:15). Keflvíkingar voru því tíu stigum á eftir þegar seinni hálfleikur byrjaði (47:37).

Keflvíkingar náðu góðum kafla í þriðja leikhluta og jöfnuðu leikinn í 64:64 en þriðja leikhluta lauk með eins stig forskoti heimamanna, 68:67.

Keflavík náði forystu í upphafi fjórða leikhluta (68:70) og voru þá komnir í fyrsta sinn yfir síðan á 2. mínútu. Þórsarar brotnuðu þó ekki við að hafa misst niður forystuna, keyrðu sig í gang á ný og náðu leiknum aftur á sitt vald. Þeir höfðu að lokum fimm stiga sigur, 88:82, og hafa pálmann í höndum sér í þessu einvígi tveggja bestu körfuboltaliða landsins.

Nú þurfa Keflvíkingar að rífa sig í gang ætli þeir ekki að láta bikarinn renna úr greipum sér. Kvennalið Grindavíkur sýndi það og sannaði í úrslitum fyrstu deildar kvenna fyrir skemmstu er ekkert ómögulegt en Keflavík, sem hefur verið yfirburðarlið í Domino's-deildinni í vetur, má ekki misstíga sig í þeim leikjum sem eftir eru.

Frammistaða Keflvíkinga: Calvin Burks Jr. 27/7 fráköst/5 stoðsendingar, Dominykas Milka 19/9 fráköst/5 stoðsendingar, Deane Williams 13/10 fráköst, Hörður Axel Vilhjálmsson 10/4 fráköst/5 stoðsendingar, Reggie Dupree 8, Valur Orri Valsson 5, Ágúst Orrason 1, Davíð Alexander H. Magnússon 0, Arnór Daði Jónsson 0, Magnús Pétursson 0, Almar Stefán Guðbrandsson 0, Þröstur Leó Jóhannsson 0.