Keflavíkurliðið í stuði á Spáni: Öskur blaðafulltrúans mældist á skjálftamælum

Knattspyrnulið Keflavíkur er í æfingaferð á Spáni og stunda þær stífar æfingar til undirbúnings fyrir komandi knattspyrnutíð á Íslandi. Jón Örvar Arason (Carlos þriðji), einn fararstjóranna og sérlegur blaðafulltrúi hópsins hefur sett skemmtilega pistla á heimasíðu Keflavíkur og hér er sá nýjasti.

Oliva Nova á Spáni, dagur fimm

Æfing í morgun og vel tekið á því í steikjandi hita hér á Oliva Nova á velli númer uno. Hörður og Jóhann Birnir á skokkinu á meðan hinir púluðu. Rajko tekur markmennina svo mikið í gegn að maður þorir ekki einu sinni að líta í áttina til þeirra. Fréttin frá því í gær um að gamlir hefðu unnið skallatennisinn er rétt. Þeir gömlu unnu alla leiki sína og þeir ungu sáu ekki til sólar... og gömlu unnu þar sinn fyrsta sigur. En þeir gömlu voru slegnir á jörðina í morgun af frískum ungum mönnum sem unnu leikinn sannfærandi og munaði miklu um góðan leik Árna Freys í marki Kjúklinganna.

Mikið var ég sáttur þegar Liverpool vann Benfica í gær. Það hefur ekki skeð oft að maður sjái þessa drengi skælbrosandi og bera höfuðið hátt þegar þessi annars ágæti klúbbur á í hlut.

FIFA2010 er á fullu hérna og heyrast öskrin úr herbergjunum langt fram á gang og aumingja herbergisþernunar eru farnar að mæta með eyrnatappa við vinnu sína. Félagarnir Siggi og Garðar eru komnir í undanúrslit.

Eini maðurinn sem þarf að láta tjasla sér saman í ferðinni er ég. Fann fyrir miklum sárauka í vinstri löpp og hásin að stríða mér að mati Fals sjúkra. Er í nuddi og rafmagni og pillutökum hjá Fal sjúkra sem nuddaði löppina svo fast að öskrið sem ég gat látið frá mér komu fram á skjálftamælum á Benidorm. Fantur þessi Falur. Dói vorkennir mér ekkert og segir að ég sé ekkert annað en Ferða-Bæklingur.

Siggi frændi er snillingur. Reddaði myndunum mínum í sína tölvu og ætlar svo að henda þeim í mína og þá get ég farið að senda myndir á heimasíðuna.

Seinni æfingin góð, æft vel og spilað mikið. Strákarnir ferskir þrátt fyrir mikla keyrslu. Þetta var sjöunda æfingin + einn leikur síðan á mánudag. Enn og aftur vinna ungir og þetta er ekki orðin frétt lengur. Eftir æfingu var farið í kalda laugina í kælingu.

Eftir kvöldmat mun hópurinn fara í spurningakeppni. Félagarnir Guðmundur og Guðjón hafa samið spurningar. Þrír hópar munu mætast; ungir, gamlir og liðstjórn. Spennandi kvöld framundan...

Kær kveðja,
Carlos þriðji

Denia FC-Keflavík 1-4
Keflavík lék við spænska liðið Denia í vikunni og vann góðan sigur. Jón Örvar lýsir því í einum pistlinum svona:

Leikurinn byrjaði rólega og menn að átta sig á grasinu og andstæðingnum. Keflavík var mun betra og Guðmundur Steinarsson skoraði á 13. mínútu með góðu skoti. Á 23. mínútu skoraði Hörður Sveinsson svo með skalla og staðan orðin 0-2. Svo kemur Guðmundur Steinarsson á 33. mínútu með þriðja markið með þrumufleyg fyrir utan teig. Staðan 0-3 í hálfleik og allt stefndi í stóran sigur.

Seinni hálfleikur byrjaði þokkalega. Mark var dæmt af sem Bjarni Hólm skoraði en á 53. mínútu skoraði Ómar Karl gott mark og staðan 0-4. Keflavík sótti mikið og fékk færi sem ekki nýttust. Heimamenn klóruðu svo í bakkann í lokin með ágætismarki sem Árni réð ekki við. Lokatölur 1-4 og Keflavík á að gera mun betur á móti svona andstæðingum.
---

Kvennalið Keflavíkur er líka við æfingar á svipuðum slóðum en liðið hélt ásamt þjálfara sínum Steinari Ingimundarsyni og fylgdarliði í æfingaferð til Canela á Spáni sl. mánudag. Æfingar hafa gengið vel mikil og góð stemmning er í liðinu. Á fimmtudaginn spiluðu þær æfingaleik við Cajasol Sporting Universidad. Þar var um mikinn hörkuleik að ræða og gáfu stelpurnar ekkert eftir. Um miðjan fyrri hálfleik náðu þær spænsku forustunni en okkar stelpur náðu að jafna um miðjan seinni hálfleik. Eftir hornspyrnu Írisar skallaði Rebekka í markið og þar við sat, úrslitin 1–1. Fínn leikur hjá Keflavíkurstelpum.

Byrjunarlið Keflavíkur í leiknum gegn Denia. Jóhann Birnir Guðmundsson með boltann á æfingu á myndinni fyrir neðan.

Þeir Sigurður Jónsson og Garðar Arnarson eru að gera heimildarmynd um Keflavíkurliðið í knattspyrnu. Þeir eru með liðinu á Spáni og sjá hér með myndavélina á lofti.