Keflavík og Reynir leika úti

Keflvíkingar mæta Hetti á Egilsstöðum í kvöld kl. 19:15 en þessari viðureign liðanna átti að vera lokið en var frestað á sínum tíma vegna leka í íþróttahúsinu á Egilsstöðum. Keflvíkingar eru tveimur leikjum á eftir KR og UMFN sem skipa 1. og 2. sætið í Iceland Express deildinni en með sigri í kvöld tekst Keflavík að jafna KR að stigum og eiga þá leik til góða.

Reynir Sandgerði mætir FSu í 1. deild karla í kvöld og þurfa Sandgerðingar nauðsynlega á sigri að halda ætli þeir sér að vera áfram í 1. deild. Liðið er á botni deildarinnar með 2 stig líkt og KFÍ en FSu er í 5. sæti deildarinnar með 12 stig. Leikurinn hefst kl. 19:30 í Iðu á Selfossi.