Keflavík og Njarðvík áfram í kvöld?

Njarðvík og Keflavík eiga möguleika á því að komast í úrslit Iceland Express deildarinnar í körfuknattleik í kvöld. Bæði lið hafa 2-1 yfir gegn Skallagrím og KR en Suðurnesjaliðin halda nú á útivöll þar sem þau lutu í lægra haldi gegn andstæðingum sínum. Leikirnir hefjast báðir kl. 20:00 í Borgarnesi og vesturbænum.

Keflavík vann fyrsta leikinn gegn Skallagrím 97 – 82 en Borgnesingar svöruðu fyrir sig á heimavelli með sigri á Íslandsmeisturunum 94 – 76. Liðin áttust svo við þann 30. mars þar sem Keflavík tók Skallagrím í kennslustund í körfubolta 129 – 79. Þrátt fyrir stórsigur í síðasta leik verður ekki hjá því horft að Keflavík hefur ekki enn landað sigri í Borgarnesi í vetur og það gæti reynst þrautinni þyngra með Borgnesinga stillta upp við vegg.

Njarðvíkingar áttu ekki í vandræðum með KR í fyrstu viðureign liðanna sem lauk með 101 – 65 sigri Njarðvíkur en urðu svo að magalenda í DHL – höllinni eftir dapran dag, 77 – 61. Þriðja rimma liðanna var fyrsti alvöru undanúrslitaleikurinn sem körfuknattleiksunnendur hafa fengið að sjá í vetur. Leiknum lauk með 91-80 sigri Njarðvíkur eftir spennandi leik þar sem úrslitin réðust ekki fyrr en á lokamínútunum.