Keflavík og Haukar mætast í úrslitum
Haukar tryggðu sér í dag sæti í úrslitum og mæta Keflavík en Haukar lögðu ÍS í oddaleik að Ásvöllum í dag 81-59. Jón Halldór Eðvaldsson, þjálfari Keflavíkurkvenna, sagði eftir síðasta leik Grindavíkur og Keflavíkur að Keflavík myndi leika til úrslita gegn ÍS en raunin varð önnur í dag.
Sigur Hauka var aldrei í hættu og því mætast Haukar og Keflavík að nýju í úrslitum en Haukar sópuðu Keflavík 3-0 inn í sumarið í fyrra og eru núverandi Íslandsmeistarar.
Körfuknattleiksáhangendur geta látið sér fara að hlakka til úrslitaleikjanna því bikarleikur liðanna fyrr á þessari leiktíð var sjónarspil sem gleymist seint.
