Keflavík og Fjölnir skildu jöfn
Bikarmeistarar Keflavíkur og Fjölnir gerðu 3-3 jafntefli í Lengjubikar karla í knattspyrnu í gærkvöldi en leikurinn fór fram í Reykjaneshöll. Fjölnismenn gerðu fyrsta mark leiksins á 6. mínútu. Keflvíkingar eru í 4. sæti með 11 stig í A deild Lengjubikarsins en þeir leika í riðli 2.
Símun Samuelsen jafnaði svo metin fyrir Keflavík í 1-1 á 24. mínútu og Guðjón Árni Antoníusson kom Keflavík í 2-1 með marki á 68. mínútu. Aðeins þremur mínútum síðar kom Hallgrímur Jónasson Keflavík í 3-1 og héldu þá margir að björninn væri unninn og þrjú stig í hús.
Svo gott reyndist það ekki vera fyrir Keflvíkinga þar sem Fjölnismenn gerðu tvö síðustu mörk leikins en þar var Pétur Georg Markan að verki með mörkum á 81. og 85. mínútu leiksins. Leikurinn í gær var jafnframt síðasti leikur Keflavíkur í Lengjubikarnum og ljóst að þeir komast ekki ofar en í fjórða sæti síns riðils þetta árið.
VF-myndir/ Ellert Grétarsson –
