Keflavík með styrktarleik fyrir Birki Alfons á föstudaginn

Meistaraflokkar karla í körfubolta og fótbolta hafa ákveðið að sameina krafta sína og efna til styrktarleiks fyrir Birki Alfons Rúnarsson föstudaginn 11. mars nk. í íþróttahúsinu við Sunnubraut í Keflavík. Leikurinn hefst kl. 19.30.

Birkir Alfons er 15 ára gamall Keflvíkingur sem greindist nýverið með bráðahvítblæði. Birkir Alfons hefur sjálfur æft körfubolta og fótbolta auk þess að vera harður stuðningsmaður Keflavíkur í báðum greinum. Vilja liðin sýna Birki Alfons stuðning í verki og láta gott af sér leiða með þessum leik.

Verð á leikinn er 1000 kr. fyrir fullorðna og 500 kr. fyrir börn yngri en 16 ára. Þeir sem vilja styrkja Birki Alfons og fjölskyldu hans enn frekar geta einnig lagt inn á reikning nr. 537-26-270396 kt. 270396-3139.

Hægt er að kaupa eitt sæti í hvoru liði og hlýtur sá sem hæst býður það sæti! Þeir sem hafa áhuga á slíku geta haft samband við Harald Frey Guðmundsson í síma 661-9391 eða Sævar Sævarsson í síma 869-1926.

Leikurinn fer þannig fram að í fyrri hálfleik verður leikinn fótbolti milli mfl. körfunnar og mfl. fótboltans og í síðari hálfleik verður leikinn körfubolti.

Leikreglur:
1x15 mínútur í fótbolta - Hvert lið hefur 6 leikmenn inn á í einu. Eitt mark jafngildir 5 stigum inn í seinni hálfleik, þar sem leikinn verður körfubolti.
2x10 mínútur í körfubolta - Hvert lið hefur 5 leikmenn inn á í einu. Stigin telja líkt og í venjulegum körfuboltaleik.

Hvort er fótboltinn betri í körfubolta eða körfuboltinn í fótbolta? Er Guðmundur Steinarsson jafn skotviss í körfunni líkt og í fótboltanum? Getur Jón Norðdal Hafsteinsson yfir höfuð sparkað í fótbolta? Svarið við þessum spurningum fæst í þessum leik...

Hinn síkáti Valtýr Björn Valtýrsson mun lýsa leiknum.
Sýnum stuðning og mætum á leikinn!