Keflavík lá óvænt gegn Val í tvíframlengdum leik

Topplið Keflavíkur í Iceland Express deild kvenna mátti sætta sig við 97-94 ósigur gegn Val í Vodafonehöllinni í kvöld eftir tvíframlengdan leik. Mikil spenna var í viðureign liðanna og óhætt er að segja að ósigur Keflavíkur hafi verið nokkuð óvæntur sé tekið mið af stigamun liðanna í deildinni. Eftir leik kvöldsins er Keflavík þó áfram á toppi deildarinnar með 22 stig en Valur hefur 8 stig í 5. sæti deildarinnar.

 

Staðan að loknum venjulegum leiktíma var 72-72 svo framlengja varð leikinn. Að lokinni fyrstu framlengingu var staðan 82-82 og nokkrir leikmenn beggja liða komnir með fimm villur eða í bullandi villuvandræðum.

 

Valskonur gáfust aldrei upp þó Keflvíkingar virtust hafa undirtökin á langstærstum köflum leiksins. Þegar skammt var til leiksloka var staðan 95-94 og Valskonur héldu í sókn. Keflavík braut á Val og Molly Peterman setti örugglega niður vítaskotin sín og kom Val í 97-94 sem reyndust lokatölur leiksins.

 

TaKesha Watson reyndist stigahæst í liði Keflavíkur með 25 stig, 9 stoðsendingar og 7 fráköst. Hjá Val var Molly Peterman með 38 stig, 10 stolna bolta og fimm fráköst. Birna Valgarðsdóttir lék sinn annan leik í kvöld með Keflavík eftir barnsburðarleyfi og sýndi að hún hefur litlu gleymt en hún gerði 13 stig í leiknum.

 

Tölfræði leiksins

 

VF-Mynd/ [email protected] – Birna stóð sig vel í sínum öðrum leik með Keflavík eftir barnsburðarleyfi en heilt yfir var Keflavíkurliðið ekki að leika vel og fékk nokkur tækifæri til að hrista Val af sér en máttu þola ósigur.