Keflavík gerði jafntefli við Val, enn á toppnum

Keflavík og Íslandsmeistarar Vals skildu jöfn, 1-1, í leik liðanna á Vodafone velinum í Reykjavík í dag. Þetta var fyrsti leikur 12. umferðar Landsbankadeildar karla og er ljóst að Keflavík mun verma toppsætið næstu umferðina hið minnsta.

Hólmar Örn Rúnarsson kom Keflvíkingum yfir á 23. mínútu með góðu skoti úr teig eftir sendingu frá Guðjóni Árna Antoníussyni. Skömmu áður hafði Þórarinn Brynjar Kristjánsson misnotað víti eftir að brotið var á Magnúsi Þorsteinssyni.

Allt stefndi í enn einn sigur toppliðsins þegar Helgi Sigurðsson jafnaði leikinn á 79. mínútu.

Lokamínúturnar voru æsispennandi þar sem Keflvíkingar áttu tvö skot í rammann, en allt kom fyrir ekki og jafntefli niðurstaðan.