Keflavík fær svissneskt lið í úrslitakeppninni

Keflavík er komið áfram í úrslitakeppni Bikarkeppni Evrópu í körfuknattleik þrátt fyrir tap, 92-82, gegn CAB Madeira. Þeir lentu í öðru sæti riðilins á eftir Bakken Bears og mæta svissneska liðinu Benetton Fribourg í næstu umferð. Keflavík hefur heimavallarrétt og verður fyrsti leikurinn því í Sláturhúsinu þan 13. janúar.

Keflvíkingar byrjuðu betur í leiknum og höfðu frumkvæðið lengi vel. Þeir leiddu 5-10 og 10-15 en heimamenn náðu þeim jafnharðan. Liðin skiptust á að hafa forystuna fram í annan leikhluta þegar allt virtist hrökkva í baklás hjá Keflvíkingum. Staðan var 27-35 þeim í vil þegar Madeira tók góðan kafla og skoraði 18 stig gegn 4 og náðu forystunni.

Staðan í hálfleik var 45-42 og var þriðji leikhluti afar spennandi þar sem hvorugt liðið náði afgerandi forskoti. Fyrir lokakaflann var staðan 64-63 fyrir Madeira, en þeir byrjuðu síðasta leikhlutann mun betur. Keflvíkingar misstu þar af lestinni og töpuðu eins og áður sagði með 8 stigum.

Það kom þó ekki að sök því Keflavík mátti tapa með allt að 13 stigum vegna hagstæðs stigahlutfalls.

Þannig er ljóst að Keflavík heldur heimavallarréttinum og munar um minna eins og þeir hafa oftsinnis sannað.

Tölfræði leiksins hefur ekki borist enn en eftirfarandi voru stigahæstir: Magnús Gunnarsson 21 stig, Nick Bradford 19, Anthony Glover 16, Sverrir Þór Sverrisson 10, Elentínus Margeirsson 9, Jón Norðdal 4 og Gunnar Einarsson 3.