Íslandsmeistaratign í sjónmáli

Rallkapparnir Jón Bjarni Hrólfsson og Borgar Ólafsson eru komnir með aðra höndina á Íslandsmeistaratitilinn í 2000cc flokki í ralli. Jón og Borgar eru efstir í sínum flokki með 35 stig og næsti maður með 20 stig þegar aðeins tvö röll eru til loka móts.

 

„Við þurfum að gera það sama og við höfum verið að gera og undirbúa okkur vel,“ sagði Jón Bjarni í samtali við Víkurfréttir en næsta mót er Alþjóðarallið helgina 17.-19. ágúst og telur það einnig til Íslandsmótsins. Alþjóðarallið er um 400 km á sérleiðum og keppt er á þremur dögum og því mikið álag á ökumönnum og bíl þá helgina. „Bíllinn hjá okkur hefur verið í toppformi og það þurfum við einnig að vera þessa helgi, ef við vinnum okkar flokk í Alþjóðarallinu þá getur enginn náð okkur og við verðum þá Íslandsmeistarar í síðasta rallinu,“ sagði Jón Bjarni en hann og Borgar undirbúa sig nú af kappi fyrir næsta rall.

 

Líklegt þykir að síðasta rall sumarsins fari fram á Suðurnesjum og þá geta þeir félagar orðið Íslandsmeistarar á heimavelli. „Ef seinasta keppnin verður heima þá kemur ekkert annað til greina en að vinna næsta rall og vinna heima,“ sagði Jón að lokum.