Ingibjörg samdi við þýskt lið
Fyrirliði Keflavíkurkvenna, Ingibjörg Elva Vilbergsdóttir, mun leika með þýska liðinu Lady Dolphins Bielefeld á næstu leiktíð og ljóst að missir Keflavíkur er talsverður. Ingibjörg Elva segir í ítarlegu spjalli við Karfan.is að hún hafi flust búferlum til að vera með kærasta sínum Loga Geirssyni sem leikur handbolta með TBV Lemgo. Þá mun hún ekki gefa kost á sér í íslenska landsliðið í sumar. Ingibjörg lék 12 deildarleiki með Keflavík á leiktíðinni og gerði í þeim 12,5 stig að meðaltali í leik.
Hverning hefur tími þinn í Þýskalandi verið, hvernig líst þér svo á þetta?
Nú er ég búinn að vera 5 vikur hérna og mjög gaman að kynnast þessu. Veðrið er búið að vera plús 20 gráður allavega fyrstu 3-4 vikurnar. Ég bý í litlu þorpi rétt við Lemgo og kann mjög vel við mig.
Kanntu eitthvað í þýsku?
Ég er farin að skilja ágætlega mikið og get bjargað mér örlítið. Ég get allavega farið að versla : ) Ég hugsa að ég fari fyrst að skilja betur og tala þegar að ég fer að umgangast stelpurnar í liðinu en þær eru allar þýskar.
Hvernig er að fara frá Keflavík og varstu sátt með árangur liðsins á síðustu leiktíð?
Deildin var sterk í ár, við náðum ekki saman á meðan Haukar og KR áttu frábæran vetur og voru erfiðar viðureignar. Tíminn minn hjá Keflavík var skemmtilegur og lærdómsríkur og var það mikill heiður fyrir mig að vera fyrirliði liðsins síðustu tvö ár. Ég eignaðist góðar vinkonur og kem svo til með að kíkja á leik næsta vetur með stelpunum.
Hverju vænta þeir frá þér í nýja liðinu Lady Dolpins Bielefeld?
Þjálfarinn telur að ég eigi eftir að styrkja liðið vegna þess að liðið missti tvo mikilvæga leikmenn, önnur verður frá vegna barneigna og hin vegna krossbandsslits. Þjálfarinn hefur mikla trú á mér, sem er mjög gott. Liðið endaði í 9. Sæti í ár og er markmiðið á næsta tímabili að standa sig betur.
Hversu langan samning gerðiru?
Ég gerði 1 árs samning með þeim skilmálum að geta skotist heim til Íslands án þess að vera rekin úr liðinu ;) Þeir tjáðu mér það að það er unnið mjög professional allt árið og æft sjaldnar og markvissara eða 3-4 sinnum í viku, 2 tíma í senn.
Hvenær byrjar undirbúningurinn og hvenær hefst næsta leiktíð?
Ég er nú þegar búin að fara á tvær æfingar en undirbúningurinn byrjar formlega 4.maí eða næstkomandi mánudag og seasonið byrjar í byrjun september.
Hvernig var fyrsta æfingin með liðinu?
Ég fór fyrst á einstaklingsæfingu með þjálfaranum eða í nokkurs konar „tryout“ og þeim leist vel á mig og buðu mér strax í kjölfarið samning sem að ég hugsaði og skrifaði undir nokkrum dögum seinna. Ég mætti svo á blaðamannafund og opna æfingu í kjölfarið þar sem ég var boðin velkomin í klúbbinn.
Sérðu fyrir þér að bæta þig þarna og jafnvel spila áfram fyrir hönd Íslands?
Já, ég er með metnað í að bæta mig og komin í nýtt umhverfi sem er krefjandi fyrir mig. Hvað varðar landsliðið þá er áhuginn fyrir hendi enda alltaf heiður að leika fyrir hönd Íslands. Núna er ég bara í þeim aðstæðum að það eru miklar breytingar í gangi og því mun ég ekki geta gefið kost á mér með landsliðinu í sumar.
Af hverju Bielefeld – 2.bundesliga?
Ég er ekki tilbúin í bundesliguna strax, þarf að komast betur inn í tungumálið og menninguna. Bielefeld er sterkt lið og mikill metnaður þar. Önnur bundesligan er talin góð hérna. Mér þykir mikilvægara að fá meiri spilatíma og ábyrgð. Kjörið til þess að komast inn í þýsku menninguna. Ég hlakka til að takast á við þetta.
[email protected]
Ljósmynd: Páll Orri Pálsson
