Hvar eru bestu stuðningsmennirnir?

Landsbankinn mun standa fyrir sérstakri keppni meðal stuðningsmanna liðanna í úrvalsdeildinni í sumar. Þessi nýjung var kynnt á kynningarfundi KSÍ fyrir Landsbankadeildina í gær.

Fulltrúar KSÍ og Landsbankans munu skera úr um hverjir séu bestu stuðningsmennirnir með tilliti til eftirfarandi þátta:
-Hávær, öflugur og samstilltur stuðningur
-Að stuðningsmenn séu vel merktir sínu félagi
-Prúðmannleg og drengileg framkoma stuðningsmanna.

Verðlaun verða veitt fyrir besta stuðningsmannahóp eftir fyrstu sex umferðirnar, fyrir umferðir 7-12 og fyrir síðustu sex umferðirnar. 100.000 krónur eru í boði í hvert skipti og mun besta stuðningsmannaliðið fyrir tímabilið í heild fá 200.000 krónur í verðlaun frá Landsbankanum. Öll peningaverðlaunin renna til starfs yngri flokka innan félaganna sem vinna.

Þetta framtak á eflaust eftir að setja skemmtilegan svip á deildina í sumar og er næsta víst að Suðurnesjamenn eiga ekki eftir að láta sitt eftir liggja.