Hrakfarir Grindvíkinga halda áfram
Harkfarir Grindvíkinga halda áfram eftir tap gegn nýliðum Fjölnis, 0-1, í þriðju umferð Landsbankadeildar karla sem fram fór í Grindavík. Hlutskipti liðanna er því eins og svart hvítt eftir fyrstu þrjár umferðirnar en Grindavík hefur tapað öllum þremur leikjum sínum í deildinni og sitja einir á botninum með ekkert stig. Fjölnismenn hafa hins vegar farið gríðarlega vel af stað í sumar og hafa sigrað í öllum sínum leikjum og sitja á toppnum, eitthvað sem enginn hefði líklega búist við fyrir mót.
Grindvíkingar gerðu tvær breytingar á liði sínu sem tapaði 3-0 fyrir Val síðasta miðvikudag. Zankarlo Simunic stóð í markinu í stað Magnúsar Þormars sem hefur staðið í marki Grindvíkinga í fyrstu tveimur leikjum liðsins. Michael Jónsson var einnig í byrjunarliðinu og tók stöðu Sveins Steingrímssonar í hægri bakverðinum.
Leikurinn fór frekar hægt af stað en strax á þriðju mínútu átti framherjinn Thomasz Stopla gott skot sem Þórður Ingason í marki Fjölnis þurfti að hafa sig allan við að verja. Orri Freyr Hjaltalín fékk svo gott færi fyrir þá gulklæddu en skalli hans úr miðjum teginum endaði í höndunum á Þórði í markinu. Grindvíkingar héldu áfram að sækja að Fjölnismönnum og á 30. mínútu átti Scott Ramsey ágætt skot úr aukaspyrnu sem Þórður í markinu varði vel. Á 34. mínútu dró hins vegar til tíðinda. Fjölnir fékk hornspyrnu undan vindinum sem að Ólafur Páll Snorrason framkvæmdi og á ótrúlegan hátt endaði boltinn í markinu og Fjölnir voru komnir yfir með marki beint úr aukaspyrnu, úr sinni fyrstu marktilraun. Sannkölluð vatnsgusa framan í Grindvíkinga og þvert á gang leiksins. Ekkert markvert gerðist fram að hálfleik og var því staðan 0-1, Fjölnismönnum í vil.
Fjölnismenn byrjuðu seinni hálfleikinn af miklum krafti og fékk Ólafur Páll úrvalsfæri til að bæta við öðru marki en skalli hans fór naumlega yfir slánna af stuttu færi. Grindvíkingar tóku hins vegar leikinn aftur í sínar hendur og héldu boltanum innan liðsins. Á 50. mínútu átti Eysteinn Hauksson hörkuskot af um 30 metra færi sem Þórður í marki Fjölnis átti ekki í erfiðleikum með að verja. Grindvíkingar héldu áfram að sækja meðan Fjölnir sat aftarlega á vellinum og beitti skyndisóknum. Litlu mátti muna að Pétur Georg Markan úr Fjölni næði að komast einn í gegnum vörnina en Orri Freyr Hjaltalín bjargaði á síðustu stundum með frábærri tæklingu. Stuttu seinna komst Pétur Georg einn í gegnum vörnina en Simunic í marki Grindvíkinga sá við honum. Pétur Markan var aftur í sviðljósinu á 82. mínútu þegar hann fékk að líta tvo gul spjöld með stuttu millibili og rauða spjaldið því raunin. Grindvíkingar reyndu eins og þeir gátu á lokamínútunum að jafna leikinn og fyrst skallaði Stolpa boltanum í slánna og á 90. mínútu átti Andri Steinn Birgisson lúmst skot sem fór af stönginni og aftur fyrir endamörk.
Þriðji sigur Fjölnis í jafnmörgum leikjum var því staðreynd þrátt fyrir að Grindvíkingar væru mun sterkari aðilinn í leiknum. Fjölnismenn vörðust hins vegar vel og spiluðu af skynsemi og með heppninni sér í lið þá tóku þeir öll þrjú stiginn. Grindvíkingar geta hins vegar nagað sig í handabaukinn fyrir að nýta ekki færin betur og verða að sætta sig við þá staðreynd að verma botnsætið í deildinni með ekkert stig eftir þrjá umferðir.
Þriðju umferð lýkur með tveimur leikjum á morgun en þá mætast ÍA og Fram á Akranesi og í Vesturbænum tekur KR á móti Breiðablik. Grindvíkingar mæta Breiðablik í næsta leik en sá leikur fer fram á Kópavogsvelli sunnudaginn 25. maí.
VF-myndir/Þorgils - Eysteinn sækir að markaskoraranum Ólafi Páli Snorrasyni - Atgangur í teig Fjölnis eftir hornspyrnu
