Hita upp fyrir bikarúrslitin í kvöld

Í kvöld fer fram sannkallaður stórleikur í Pepsi-deild karla í knattspyrnu sem jafnframt er upphitun fyrir bikarúrslitaleikinn sem fram fer um næstu helgi. Keflvíkingar heimsækja þá KR-inga í Vesturbæinn en liðin munu einnig berjast um bikarinn í vikunni á Laugardalsvelli.

Fyrir leikinn er Keflavík í 6. sæti deildarinnar með 18 stig en KR er í 4. sætinu með 23 stig. Keflvíkingar hafa á heimasíðu tekið saman nokkra punkta um viðureignir liðanna í gegnum tíðina sem sjá má hér að neðan.

Efsta deild
Keflavík og KR hafa leikið 96 leiki í efstu deild, þann fyrsta árið 1958. Nokkuð jafnræði hefur verið með liðunum í gegnum árin, Keflavík hefur sigrað í 32 leikjum og KR í 35 en 29 leikjanna hefur lokið með jafntefli. Markatalan er 128-149, KR í vil.  Stærsti sigur Keflavíkur í innbyrðis leikjum liðanna var 5-1 sigur á Keflavíkurvelli árið 1974. Stærsti sigur KR-inga er hins vegar 8-1 árið 1960 og það er jafnframt mesti markaleikur þessara liða. Fimm leikmenn í leikmannahópi Keflavíkur hafa skorað gegn KR í efstu deild; Hörður Sveinsson hefur skorað þrjú mörk, Jóhann B. Guðmundsson tvö og þeir Frans Elvarsson, Magnús Þórir Matthíasson og Magnús Þorsteinsson eitt mark hver. Það er hins vegar Guðmundur Steinarsson sem hefur gert flest mörk fyrir Keflavík gegn KR í efstu deild eða 12, næstir eru Jón Ólafur Jónsson og Steinar Jóhannsson með 8 mörk hvor.

Bikarkeppnin
Liðin hafa mæst 12 sinnum í bikarkeppni KSÍ, fyrst árið 1963 og síðast árið 2010. Keflavík hefur unnið 5 bikarleiki en KR 7. Markatalan í bikarnum er 20-26 fyrir KR. Magnús Þórir Matthíasson hefur skorað eitt bikarmark gegn KR. Ragnar Margeirsson hefur gert flest bikarmörk gegn KR en þau voru þrjú talsins.

Síðast
Fyrr í sumar mættust á Nettó-vellinum og þar gerðu KR-ingar eina mark leiksins en það gerði Óskar Örn Hauksson í blálokin.

Bæði lið
Þó nokkrir leikmenn hafa leikið með bæði Keflavík og KR í gegnum árin og ekki síður hafa félögin deilt sömu þjálfurunum.  Guðni Kjartansson, Hólmbert Friðjónsson, Ian Ross, Pétur Pétursson og Willum Þór Þórsson hafa allir þjálfað bæði liðin.  Upp úr 1990 var hálfgerð Keflavíkurnýlenda í Vesturbænum þegar Ólafur Gottskálksson, Sigurður Björgvinsson, Gunnar Oddsson og Ragnar Margeirsson léku þar allir undir stjórn Guðna.  Seinni árin hafa Haukur Ingi Guðnason, Stefán Gíslason og markmennirnir Bjarki Freyr Guðmundsson og Gunnleifur Gunnleifsson skipt milli þessara liða.  Tveir fyrrverandi leikmenn okkar, Baldur Sigurðsson og Jónas Guðni Sævarsson, leika nú með KR.

Úrslit í leikjum KR og Keflavíkur á heimavelli KR-inga hafa orðið þessi undanfarin ár:
2013  KR - Keflavík  3-0  
2012  KR - Keflavík  3-0  
2011  KR - Keflavík  1-1  Hilmar Geir Eiðsson
2010  KR - Keflavík  0-0  
2009  KR - Keflavík  4-1  Alen Sutej
2008  KR - Keflavík  2-2  Guðmundur Steinarsson, Jón Gunnar Eysteinsson
2007  KR - Keflavík  1-2  Guðmundur Steinarsson, Símun Samuelsen
2006  KR - Keflavík  2-2  Guðmundur Steinarsson, Þórarinn Kristjánsson
2005  KR - Keflavík  1-3  Kenneth Gustafsson, Baldur Sigurðsson, Hörður Sveinsson
2004  KR - Keflavík  1-1  Hólmar Örn Rúnarsson