Hef aldrei áður hitt eins vel með 3-járni

Það hljóp heldur betur á snærið hjá skipstjóranum Ibsen Angantýssyni er hann var að spila golf á Hólmsvelli í Leiru í gær. Hann sá þar mink við 10. teig og drap hann með 3-járni. „Ég held að ég hafi aldrei áður hitt eins vel með 3-járninu og í þessu höggi. Ég hef yfirleitt alltaf verið í svolitlum vandræðum með að slá með 3-járni, en loksins kom gott högg fyrir mig, en ekki fyrir dýrið,“ sagði Ibsen í samtali við Kylfing.is.

 

Ibsen sagði að minkurinn hafi verið að flækjast við tjörnina sem er við litla skálann við 10. teig „Hann var upp á pallinum við skálann að þurrka sér eftir að hafa stungið sér til sunds í tjörninni við hliðina. Þegar ég kom fyrir hornið á skálanum með kylfuna brá honum töluvert og ég tók góða baksveiflu og sló til hans  og felldi hann í fyrsta höggi. Ég vorkenndi nú greyinu, en hann er algjör skaðvaldur í fuglalífinu. Ég var búinn að sjá hann áður í læknum sem liggur með 18. brautinni og fuglarnir sveimuðu yfir honum og það fór ekkert á milli mála hvar hann var að þvælast,“ sagði Ibsen.

 

Hægt er að lesa greinina í heild sinni á Kylfingur.is með því að smella hér