Háspenna!!

„Þetta var háspenna allan tímann!“, sagði Guðjón Skúlason, réttilega, í leikslok og þakkaði sigurinn góðum varnarleik. „Sverrir kom inná og breytti gangi leiksins með því að leika góða vörn á Dickerson. Þá tókum við riþmann úr sókninni hjá þeim og sóknin fór að smella hjá okkur. Ég er samt ekki alveg sáttur við að þegar við náðum 14 stiga forskoti að við skulum ekki ná að halda því eða bæta við það undir lokin. En það verður ekki af Snæfellingum tekið að þeir eru með gott lið og gefast aldrei upp og berjast á 100% krafti allan leikinn.“
Guðjón sagði að þetta yrði vonandi lagað fyrir næsta leik og sagðist mjög bjartsýnn fyrir þann slag. „Við höldum bara okkar striki, það er ekki spurning.“

Magnús Þór Gunnarsson hefur komið mjög sterkur inn fyrir Keflvíkinga í úrslitakeppnina og hefur aldeilis reynst betri en enginn á ögurstundum. Hann skoraði 18 stig í kvöld, þar af 11 í lokafjórðungnum.
„Falur sagði okkur fyrir leikinn að við ættum að spila eins og þetta væri okkar síðasti leikur.“, sagði Magnús og bætti við að litlu hefði mátt muna að Snæfell kæmist aftur inn í leikinn undir lokin. „Við héldum að þetta væri komið, en þeir hætta aldrei þessir strákar þannig að við verðum að koma tilbúnir í næsta leik. En það verður fjör!“

Stigahæstir:
Keflavík: Bradford 26, Allen 25, Magnús 18, Fannar 12. Gunnar Einarsson 9.
Snæfell: Whitmore 25, Hlynur Bæringsson 23/16, Dickerson 22, Dotson 19.