Gunnar Örlygs segir að ef einhvern eigi að reka, sé það hann

Gunnar Örlygsson, formaður Körfuknattleiksdeildar Njarðvíkur, sagði á Facebook síðu sinni í gærkvöldi eftir tapleik Njarðvíkur gegn Keflavík í Maltbikarnum að ef einhvern eigi að reka, þá sé það hann. Hann hafi ekki staðið sig í stykkinu með stóra leikmenn í liðið.

Njarðvíkurliðið er með þrjú töp og tvo sigra í Dominos deildinni og er nú dottið út úr Maltbikarnum. Miðherjinn Corbin Jackson var látinn fara frá félaginu þar sem hann þótti ekki standa undir væntingum og hefur liðið því verið í vandræðum með að fylla stöðu miðherja. Páll Kristinsson og Hjörtur Hrafn Einarsson voru báðir fengnir inn í hópinn aftur en Páll hafði lagt skóna á hilluna og Hjörtur hafði einnig ákveðið að hætta fyrir þetta tímabil. 

Að sögn Daníels Guðna, þjálfara Njarðvíkinga, kemur nýr kani í næstu viku sem mun spila stöðu miðherja. Vegna reglna í íslenskum körfubolta um að aðeins megi einn bandarískur leikmaður spila inni á vellinum hverju sinni þýðir þetta að Daníel mun þurfa að deila spilatíma milli Stefan Bonneau og nýja kanans.

Facebook færslu Gunnars Örlygssonar má sjá hér í heild sinni:
„Ég styð lið mitt og minn þjálfara 100%. Nú eru neikvæðar raddir byrjaðar að heyrast um gengi liðsins okkar - Njarðvík. Ég skil þessa óþolinmæði. Ef eh á að reka - þá skal reka mig fyrir að hafa ekki staðið mig í stykkinu með stóra leikmenn í liðið. Þarna féll ég á prófinu sem formaður KKD Njarðvíkur. En það er ekki öll nótt úti enn. Spyrjum að leikslokum, við munum bíta frá okkur. Trúi því og treysti 100%. Njarðvík skal verða meðal allra bestu liða landsins ef ekki það besta í vor. Áfram Njarðvík.“